വീട് നിർമ്മിക്കാൻ തയ്യാറെടുക്കുന്നവർ ആദ്യം ചെയ്യുക പ്ലാൻ ഡിസൈൻ ചെയ്യുക എന്നതാണല്ലോ?
അടുത്തതായി അവർക്ക് മുന്നിലേക്ക് വരുന്ന കടമ്പയാണ് കൺസ്ട്രക്ഷൻ പെർമിറ്റ്‌ എടുക്കുക എന്നത്.
പെർമിറ്റ്‌ എടുക്കാതെ വീട് പണിയാൻ സാധിക്കുമോ?
നമ്മൾ വീട് പണി കോൺട്രാക്ട് കൊടുക്കുമ്പോൾ കോൺട്രാക്ടർ പറയുകയാണ് ”തല്ക്കാലം നമുക്കിപ്പോൾ പെർമിറ്റ്‌ എടുക്കേണ്ട പണി പുരോഗമിക്കുന്നതിനനുസരിച്ചു അല്ലെങ്കിൽ വീട് പണി കഴിയുമ്പോൾ നമ്പർ ലഭിക്കുന്നതിനുള്ള കാര്യങ്ങൾ ചെയ്യുമ്പോൾ ഒരുമിച്ചു ചെയ്യാം”
ഇങ്ങിനെ ഒരു കോൺട്രാക്ടർ അല്ലെങ്കിൽ മറ്റാരെങ്കിലുമോ പറയുകയാണെങ്കിൽ ഒരിക്കലും അത് ചെവികൊള്ളാതിരിക്കുക.
പെർമിറ്റ്‌ എടുത്തുകൊണ്ടു മാത്രം വീട് നിർമ്മാണം ആരംഭിക്കുക,
എന്തെന്നാൽ നാം വീട് നിർമ്മാണം ആരംഭിക്കുന്നതിനു മുന്പായി നിർബന്ധമായും പെർമിറ്റ്‌ എടുക്കുകയെന്നാൽ ഉദ്ദേശിക്കുന്നത്` നാം ഡിസൈൻ ചെയ്ത വീട് നമ്മുടെ പ്ലോട്ടിൽ നിർമ്മിക്കുന്നതിനുള്ള അനുമതിയും അത് കെട്ടിട നിർമ്മാണ നിയമങ്ങൾ അനുസരിച്ചുകൊണ്ടാണ് എന്നുള്ള ഉറപ്പുമാണ് നാം നേടുന്നത്.
മാസങ്ങളുടെ കണക്കിൽ കെട്ടിട നിർമ്മാണ നിയമങ്ങൾ മാറിക്കൊണ്ടിരിക്കുകയാണ്, ആയതിനാൽ തന്നെ പെർമിറ്റ്‌ എടുക്കേണ്ടത്തിന്റെ പ്രധാന്യവും വർദ്ധിക്കുന്നു.
പെർമിറ്റ്‌ എടുക്കുക എന്നാൽ വെറുതെ ഒരു പെർമിഷൻ എഴുതി ലഭിക്കുന്നു എന്നതല്ല അതിൽ ഒരുപാട് കാര്യങ്ങൾ അടങ്ങിയിരിക്കുന്നു.